Óður til skemmtanalífsins í Reykjavík.

Ég er bara 18 ára og kenna á því fæ
Klukkan tólf á miðnætti er mér dröslað nið'rí bæ
Undan háum skónum gef ég frá mér lítið kvein
Því haldi ég áfram svona verð ég bráðum allt of sein

Kríublundur til hádegis og hvítvínsflaska á kvöldin,
Mér er sagt að bíða meðan frostið bítur kinn
Kríublundur til hádegis og hvítvínsflaska á kvöldin,
Ég er orðin stressuð yfir að komast ekki inn.

Framar í röðina ég treð mér nú og ýti
Orðin frekar vönkuð eftir stympingar og tog
Stelpan fyrir aftan mig ryðst fram úr mér í flýti
Ég held ég tryllist bráðlega, detti og fái flog.

Kríublundur til hádegis og hvítvínsflaska á kvöldin,'
Ennþá látin bíða meðan næsti maður fer
Kríublundur til hádegis og hvítvínsflaska á kvöldin,
Eitt er víst að dyravörður ræður öllu hér.

Bráðum kemur sólin upp og ég er ennþá hér
Lykla-Pétur enn svo upptekinn af sjálfum sér
Tíminn er svo afskaplega lengi enn að líða
En sjá, nú þarf ég loksins ekki lengur hér að bíða...

Athugasemdir

[Elísabet Kristjánsdóttir, 18.3.2008 kl. 00:29]

Frábært, yndislegt. Hvaða 18 ára stúlka þekkir þetta ekki? Það var nú auðveldara að komast inn þegar við vorum 16 í stuttum pilsum ha?!

[kristin (IP-tala skráð) 18.3.2008 kl. 11:54]

Hættu að fara út á skemmtanalífið. Þetta brölt á greinlega illa við þig.

kv.

Mamma

[HT (IP-tala skráð) 18.3.2008 kl. 15:03]

Ef mitt skemmtistaðabrölt á hennar aldri hefði fætt af sér heilu drápurnar, ja þá hefði nú til einhvers verið farið.

Hef líka ísmeygilegan grun um að henni sé ekki eins leitt og hún lætur...